Даволі насычаным быў парадак дня дваццаць першай сесіі раённага Савета дэпутатаў дваццаць восьмага склікання. Народныя абраннікі разгледзелі шэсць пытанняў.

Аб тым, як рэалізуецца на тэрыторыі раёна Дзяржаўная праграма “Здароўе народа і дэмаграфічная бяспека Рэсублікі Беларусь на 2016-2020 гады” на пасяджэнні агучыла галоўны ўрач установы аховы здароўя “Жыткавіцкая цэнтральная раённая бальніца” Людміла Катлярчук. Па словах Людмілы Віктараўны, нягледзячы на прымаемыя захады, у рэгіёне назіраецца зніжэнне насельніцтва.  На першае верасня ў раёне  налічваецца 34803 жыхары. Гэта на 567 чалавек меней чым было летась. Аналізуючы становішча з дэмаграфіяй, спецыяліст акрэсліла тыя негатыўныя фактары, што аказваюць адмоўны ўплыў  на здароўе і колькасны склад жыткаўчан, а таксама праінфармавала народных абраннікаў пра захады, якія прымаюцца па стабілізацыі сітуацыі.  Менавіта на гэтым зрабілі акцэнт і ў сваім рашэнні і дэпутаты. У прынятай пастанове прапісаны даручэнні раённым службам, ад зладжанай працы якіх залежыць здароўе жыхароў. У прыватнасці, меры тычацца зніжэння захворваемасці, паляпшэння медыцынскага абслугоўвання і ўмоў працы на вытворчасці, выкаранення злачынстваў  на бытавой глебе ў п’яным стане, прафілактыкі гібелі людзей падчас надзвычайных сітуацый, а таксама  прапаганды здаровага ладу жыцця. Менавіта толькі сумеснымі намаганнямі можна стварыць аснову для паляпшэння здароўя народа і забяспечыць дэмаграфічную стабільнасць.

На сесіі дыпутаты  ўнеслі і зацвердзілі змяненні ў прынятыя раней пастановы.

Сяргей БЕЛКА