Гэтую працу ім патрэбна выканаць больш чым на пяці тысячах трохсот гектарах. Сёлета для патрэб грамадскай жывёлагадоўлі плануецца на зімовы перыяд назапасіць 5391 тону сена, 47800 тон сенажу і 180000 тон сіласу.

У КСУПе “Коленскае” без прамаруджвання, можна сказаць, першымі ў раёне прыступілі да касьбы траў. Тут кармавыя ўгоддзі разам з поймавымі лугамі раскінуліся амаль на паўтары тысячы гектараў. Убраць іх у гаспадарцы збіраюцца ў самыя аптымальныя тэрміны, каб трава не перастаяла, а пад павеці і ў сіласныя траншэі паступіў высокаякасны корм.
— Зараз асноўнай для нас задачай з’яўляецца касьба траў, з якой найперш будзем нарыхтоўваць сена і сянаж, — з гэтымі словамі дырэктар сельгаспрадпрыемства Валянцін Карпаў спыніў свой службовы аўтамабіль ля адной са шматлікіх грамадскіх сенажацяў, дзе вялася касьба. З пастаўленымі задачамі мы справімся, для гэтага ў нас і тэхнікі дастаткова, і спрактыкаваных механізатарскіх кадраў.
Правату кіраўніка тут жа на месцы пацвердзіў сваёй працай механізатар Мікалай Юхневіч, які да абеда на сваім магутным “Беларусу” у счэпе з шыроказахопнай касілкай паклаў у валкі траву не на адным дзясятку гектараў.
— Трава вырасла вельмі добрая, густая, таму і працуецца ў ахвоту, — гаворыць Мікалай. — З тыдзень прайшло, як пачалі ў гаспадарцы зялёнае жніво, а ўжо на свой вытворчы рахунак запісаў амаль трыста гектараў скошанай травы. Тэхніка вельмі высокапрадукцыйная, за адзін праход пракошваю дзевяць метраў, а за дзень — да паўсотні гектараў.
Стараннасць гэтага механізатара ў рабоце зразумелая. Менавіта ён разам са сваімі калегамі павінны забяспечыць аб’ём работы кормаздабываючым атрадам, які нарыхтоўвае сянаж. А тэхнікай гэтыя структурныя падраздзяленні таксама не абдзелены. Толькі адных кормаздабываючых камбайнаў у іх налічваецца тры штукі, ды і спецыялісты на іх працуюць, так бы мовіць, не лыкам шытыя. Не адзін год яны паказвалі добрую выпрацоўку на кармавых угоддзях гаспадаркі. У прыватнасці, гэта Аляксандр Дрынеўскі, Міхаіл Пяшэвіч і Мікалай Гулюта. Дастаткова і тэхнікі ў атрадах для адвозкі зялёнай масы да месцаў яе закладкі. Увогуле ў сельгаспрадпрыемстве цяпер усе нацэлены, каб не толькі назапасіць большую колькасць травянога корму, але і захаваць высокія яго спажыўныя якасці. Таму значная ўвага надаецца тэрмінам закладкі кожнай траншэі, трамбоўцы дастаўленай з лугоў масы, стараюцца яе перад ўборкай правяліць.
— І на касьбе траў, і на ўборцы мы яшчэ можам значна прыбавіць,— адзначае дырэктар валянцін Карпаў. — Матэрыяльныя рэсурсы маюцца. Гэта яшчэ адна шыроказахопная касілка, тры меншыя. Спатрэбіцца — уключым і іх у работу.
Дарэчы, адна адзінка з гэтага тэхнічнага арсеналу сельгаспрадпрыемства ўжо ў справе. Працуе на касьбе механізатар Мікалай Хільман. Але пакуль галоўная яго задача — падкошванне выпасаў. Іх у гаспадарцы маецца для грамадскага статка дастаткова, а цяперашнія пагодныя ўмовы спрыяюць росту травы. Таму без догляду за пашай абысціся немагчыма, травастой перарасце, знізіцца яго паядаемасць жывёлай, а ў канчатковым выніку гэта адмоўна адаб’ецца на надоях малака. Трэба сказаць, што на корм жывёле на грамадскія фермы штодня паступае сто тон “зялёнкі”, якая ўводзіцца ў кормасумесі. Але такі расход кіраўніцтва КСУПа “Коленскае” не палохае. Хопіць і цяпер даваць статку, хопіць, каб і на зіму запас зрабіць. Травы ў гаспадарцы дастаткова. Бо плённа папрацавалі на гэта ў мінулыя гады, калі актыўна вялі перазалужэнне сваіх угоддзяў, распрацоўвалі няўдобіцы, якія таксама засявалі травамі. Толькі на апошніх гэтая работа была выканана больш чым на паўтысячы гектарах. Цяпер Валянцін Мікалаевіч Карпаў з гонарам паказвае густыя валкі канюшыны і люцэрны, іншага разнатраўя. І гэта ўсё вырасла на зямлі, якая яшчэ год назад была паросшая сітнікам і хмызняком, ды занятая балоцінамі. Самае важнае, што працу па ўвядзенні няўдобіц у сельгасабарот у прадпрыемстве працягваюць, бо пераканаліся: і тут можна мець належную аддачу, а значыць і трывалую кармавую базу для грамадскай жывёлагадоўлі. Галоўнае ж у выніковасці работы гэтай галіны: будзе дастатак кармоў, будуць высокія прывагі і надоі на фермах гаспадаркі.
Сяргей БЕЛКА.