Па выніках сёлетняга футбольнага сезону абаронца каманды “Меліяратар” Аляксандр Цімашышын, па меркаванні чытачоў “Новага Палесся”, стаў уладальнікам прыза глядацкіх сімпатый. Днямі супрацоўнікі рэдакцыі ўручылі спартсмену заслужаную ўзнагароду.

Захапляцца футболам Аляксандр пачаў з дзяцінства. Пра тое, як прыйшоў у секцыю, расказвае проста:

— У агульнаадукацыйную школу, дзе вучыўся, завітаў трэнер ДЮСШ, які ўсіх хлопцаў запрасіў на заняткі. Вось так і далучыўся да здаровага ладу жыцця.

Спорт для Цімашышына стаў не толькі хобі. Менавіта ён закаліў характар маладога чалавека, у пастаянных трэніроўках выпрацаваў байцоўскія якасці, якія ва ўсёй красе дэманструе не адзін год на зялёным газоне падчас шматлікіх спаборніцтваў.  Найбольш значнымі з іх з’яўляюцца выступленні ў камандах “ЮАС” і “Меліяратар” у першай і другой лігах беларускага футбольнага чэмпіяната. Аляксандр удзельнічае і ў раённым першынстве. Праўда, тут ён стараецца не толькі ў абароне, але і ў нападзенні. Нездарма за прайшоўшы сезон запісаў на ўласны рахунак дваццаць пяць галоў у вароты сапернікаў.

— Канечне, нечаканым стала такое прызнанне  аматараў гульні нумар адзін, — гаворыць спартсмен, — але разам з тым сюрпрыз перад новым годам даволі прыемны.

Не спадзяваўся Аляксандр і на падарункі ад “Новага Палесся”.  Калектыў газеты, які аказвае інфармацыйнае спонсарства многім рэгіянальным спаборніцтвам, з належнай адказнасцю прыслухаўся да меркавання заўзятараў раёна і аддзячыў Цімашышына за яго выдатную гульню і адданасць любімаму віду спорту.

Нельга не адзначыць, што Аляксандр — клапатлівы бацька. У яго сям’і падрастае трое дзетак. Нядаўна ячэйка Цімашышыных справіла наваселле. А гэта прамое сведчанне таго, што яшчэ не ў адным матчы малады чалавек выйдзе на поле, каб парадаваць жыткаўчан, а ў будучым, магчыма, гэта зробяць і яго нашчадкі.

Сяргей БЕЛКА