Некалькі  праблемных пытанняў, якія тычацца жыццядзейнасці насельніцтва раёна, давялося  вырашаць старшыні раённага Савета дэпутатаў Уладзіміру Куляшу. Са сваімі турботамі людзі звярнуліся да яго падчас «прамой тэлефоннай лініі».

Першай дазванілася жыхарка з вёскі Вятчын. Жанчына з’яўляецца і дэпутатам мясцовага Савета, і даверанай асобай старшыні сельвыканкама ў згаданым паселішчы. Таму і прасіла за ўсю грамаду, каб у паселішчы палепшыліся справы з гандлёвым абслугоўваннем.

– Крама працуе дрэнна, аўталаўка, якая прыязджае два разы на тыдзень, не задавальняе попыту жыхароў у поўным аб’ёме, – распавядала заяўніца. – Вёска ж немалая, асабліва шмат людзей тут бавяць час летам, калі пачынаецца сезон збору грыбоў і ягад. І магазін запатрабаваны, галоўнае, каб на паліцах была разнастайная прадукцыя. А цяперашняя гаспадыня прылаўка аб гэтым дбае слаба.

Уладзімір Мікітавіч прыняў довады жанчыны, папрасіў час для кансультацыі з кіраўніцтвам філіяла спажывецкага таварыства. Такі ход  задаволіў вяскоўку, і яна паабяцала звярнуцца яшчэ раз.

Жыткаўчаніна таксама турбавала пытанне гандлю. Праўда, больш спецыфічнае: дзе ў райцэнтры можна купіць карасёў.

– Раней гэтую рыбу можна было набыць у магазіне ААТ «Жыткавічыхімсервіс», – дзяліўся ўласным досведам з кіраўніком райсавета дэпутатаў мужчына. – Цяпер жа такога тавару няма, ды і ў асартыменце рыбгаса таксама з карасямі праблема.

І гэтае пытанне Уладзімір Кулеш узяў на кантроль, каб з часам разабрацца і даць кампетэнтны адказ грамадзяніну.

«Прамая тэлефонная лінія» ў чарговы раз засведчыла, што жыхары раёна звяртаюцца да прадстаўнікоў улады па самых розных пытаннях. І многія з іх вырашаюцца паспяхова.